Laugardagur 26. apríl 2008

Hélt gangandi niður í bæ um tíuleytið. Á leiðinni mætti ég manni með hund sem gelti kurteislega til málamynda og kom í ljós að hann heitir Skuggi. Á Laugaveginum var ég svo heppinn að hitta gamlan skólafélaga minn og endaði það með því að hann bauð mér að borða á Hressó sem varð þó  kostnaðarsamara en hann gerði ráð fyrir þar sem sem skammturinn dugði vart upp í nös á ketti þrátt fyrir himinhátt verð og hann varð því að borga tvo skammta ofan í mig. En ég bætti það reyndar upp með því að brenna nokkrar bíómyndir og böns af úrvalstónlist auk nokkurra bóka á tvo DVD diska fyrir hann. Þannig að báðir enduðu hæstánægðir og kvöddumst með virktum. Þá er ég yfirgaf búlluna var ég svo heppinn að einhverjir hugsjónamenn voru með ókeypis málsverð við hornið á dómshúsinu og komst ég ekki frá þeim án þess að éta heilan disk af ágætis grænmetisgumsi. Sem reddaði deginum endanlega, guð gefi að öndvegisdrengir verði með þessa úrvalsþjónustu daglega í allt sumar. 

Að öðru leyti hefur dagurinn verið tíðindalítill fyrir utan smávægileg atvik sem henta kannski ekki mjög vel til birtingar. Over and out. 

 

Athugasemdir

[Baldur Fjölnisson, 26.4.2008 kl. 21:06]

Já, ég gafst upp á bréfskákinni fyrir hvað 12-13 árum.

Annars var ég með þeim fyrstu í netskákinni enda hef ég notað netið í heil 17 ár eða lengur en 99.9999% núverandi notenda. Og skákfrík voru þá þegar búin að koma upp vettvangi sem enn lifir, ICC, Internet Chess Club. Ég kenndi reyndar ýmsum skákfrömuðum landsins að tefla - á internetinu .

En ég er löngu hættur að tefla en er hins vegar núna mjög eitraður í backgammon.

[Baldur Fjölnisson, 26.4.2008 kl. 21:21]

En þar sem ég stóð þarna við hornið á dómshúsinu og sporðrenndi hinu ágæta grænmetisgumsi með tófú og kartöflumús þá laust því allt í einu niður í mig - hversu auðvelt er að kollvarpa þessu dauðadæmda skipulagi - það þarf í rauninni ekki annað en nokkra tugi manna með 10-20 hundrað lítra potta á strategískum stöðum í borginni sem gefa hverjum sem vill frítt að éta. Kostnaðurinn er hlægilegur, megnið af hráefninu er gefið og jafnvel þó það kosti einhverjar milljónir að hjálpa kerfi sem þegar riðar til falls vegna eigin brjálsemi og ruglanda, til að hrynja endanlega - þá er það bara pínöts. Góðar stundir.

[Baldur Fjölnisson, 26.4.2008 kl. 23:35]

Ég get ekki beðið eftir að sjá á youtube víkingasveitina loka ókeypis matvæladreifingu á Íslandi þegar allir vita að matvælaverð rýkur upp í heimi vorum. Kerfið er í eðli sínu sjálfseyðandi og það er bara nauðsynlegt og gott. Eitthvað skárra mun vonandi taka við. Það er um að gera að hjálpa því að hrynja og þarf sáralítið til.