Sonur Kauphallarstjóra handtekinn vegna gruns um peningaþvætti

Friðjón Þórðarson forstöðumaður verðbréfamiðlunar hjá verðbréfafyrirtækinu Virðingu hf. var handtekinn í gær vegna gruns um stófelld auðgunarbrot og brot á lögum um peningaþvætti. Ákvörðun um hvort krafist verði gæsluvarðhalds yfir honum verður tekin síðar í dag. Friðjón er sonur Þórðar Friðjónssonar forstjóra Kauphallarinnar.

Morgunblaðið greinir frá því í morgun að forstöðumaður verðbréfamiðlunar hjá Virðingu sé einnig grunaður um að hafa millifært mörg hundruð milljónir króna frá félaginu inn á bankareikning samverkamanna sinna og um að hafa misnotað trúnaðarupplýsingar til að eiga viðskipti sem teljast óeðlileg miðað við stöðu mannsins.

Þröstur Olaf Sigurjónsson stjórnarformaður Virðingar segir í samtali við Vísi að verðbréfafyrirtækið hafi ekki vitað um málið fyrr en lögregla lagði hald á gögn þar fyrir helgi en vildi að öðru leyti lítið tjá sig um málið.

Ekki náðist í Þórð Friðjónsson við vinnslu fréttarinnar.

Vísir, 24. nóv. 2008 13:40