Skuldatryggingauppboð að hefjast, Landsbanki fyrstur undir hamarinn

Vísir, 03. nóv. 2008 13:10

Uppboð á skuldatryggingum íslensku bankanna hefjast í þessari viku. Landsbankinn er fyrstur undir hamarinn á morgun. Reiknað er með að þeir sem seldu tryggingarnar og ábyrgðust þar með lán til bankanna þurfi að borga 97% af andvirði lánanna.

Uppboðið ákveður hve mikill hluti af tryggingunum verður greiddur en eins og áður hefur komið fram á visir.is ganga skuldabréf íslensku bankanna kaupum og sölum erlendis á 3 aura fyrir krónuna eða með 97% afföllum.

Uppboðin verður haldið á vegum International Swaps and Derivatives Association (ISDA) og verða þetta fyrstu uppboð sinnar tegundar í Evrópu. Glitnir fer undir hamarinn á miðvikudag og Kaupþing á fimmtudag.

Fjallað er um málið á Bloomberg-fréttaveitunni. Þar segir Tim Brunne lánasérfræðingur hjá UniCredit SpA í Munchen að miðað við markaðsverð íslensku bréfanna munu næstum ekkert fást upp í kröfur seljenda að tryggingunum.

Yfir 160 bankar og fjárfestar hafa skráð sig fyrir uppgjöri á skuldatryggingum íslensku bankanna. Ekki er nákvæmlega vitað um hve stóra heildaruppjæð er að ræða en ISDA áætlar að hún nemi 55 milljörðum dollara að um 6.000 milljörðum kr.. Vogunarsjóðir, tryggingarfélög og bankar eru þeir sem venjulega kaupa og selja skuldatryggingar. Og þá annaðhvort til að tryggja að skuldabréf verði ekki gjaldfelld eða veðja á að félög geti ekki borgað skuldir sínar.

Á Bloomberg er tekið dæmi af Primus Guaranty Ltd, tryggingarfélagi sem staðsett er á Bermúdaeyjum. Það seldi skuldatryggingar á lán til Kaupþings að uppbæð rúmlega 68 milljón dollara eða um 7 milljarða kr.. Það seldi einnig tryggingar á lán til Lehman Brothers, Freddie May og Fannie Mac samtals að uppbæð tæplega 300 milljónir dollara. Félagið segir að það eigi sjóð upp á 800 milljónir dollara til að mæta þessum ábyrgðum sem félagið situr uppi með.

http://visir.is/article/20081103/VIDSKIPTI06/624141915/-1