Rússar segja að lán til Íslands væri áhættusamt

Rússnesk stjórnvöld segja, að eins og staðan sé nú væri afar áhættusamt að verða við óskum Íslands um gjaldeyrislán. Rússneska fréttastofan Prime-Tass hefur eftir Dmitrí Pankin, aðstoðarfjármálaráðherra, að beðið sé niðurstöðu viðræðna Íslands við Alþjóðagjaldeyrissjóðinn og aðra hugsanlega lánveitendur áður en endanleg ákvörðun verður tekin um lánið.

Þegar viðræður hófust við Rússa snemma í október var rætt um 4 milljarða evra lán. Pankin segir, að í ljósi þess að bankakerfið á Íslandi sé hrunið, sé frekar erfitt að samþykkja lán.

„Eins og nú stendur á fylgdi mikil áhætta slíkri fjárfestingu og jafnvel þótt ákvörðun yrði tekin um að veita lánið yrðum við að vega og meta áhættuna afar vandlega," segir Pankin. 

mbl.is