Talið að alvarlegur verkefnaskortur ógni atvinnuleysisgeymslum lögreglunnar

Vísir, 10. júl. 2008 16:30

Sagður hafa yfirtekið Lækjartorg með skætingi

Steinþór Árnason, eigandi Segafredo. MYND/Jóhannes Kr.

Atli Steinn Guðmundsson skrifar:

Steinþór Árnason, sem rekur kaffihúsið Segafredo við Lækjartorg, segist gáttaður á framkomu lögreglumanna sem heimsóttu hann um tvöleytið í dag. „Ég fékk bráðabirgðaleyfið í dag fyrir 20 borðum fyrir utan staðinn. Á sama tíma og ég er að skrifa þakkarbréf til lögreglustjóra koma tveir lögreglumenn á staðinn og segja mér hreinlega að þeir botni ekkert í mér," útskýrir Steinþór.

Lögreglumennirnir voru að sögn Steinþórs ekki ánægðir með þá háttsemi hans að hafa fleiri borð úti en honum væri heimilt. „Þeir sögðu að ég væri með dónaskap og óvirðingu við íbúa Reykjavíkur og bættu því við að ég væri að yfirtaka torgið með skætingi," sagði Steinþór og sór og sárt við lagði að hann hefði ætíð gætt þess í hvívetna að ganga vel um torgið og hafa borð staðarins ekki fyrir gangandi vegfarendum eða öðrum sem leið eiga um torgið.

„Borgarfulltrúar, meðal annars Jakob Frímann, hafa hælt mér fyrir umgengni mína á torginu og hvað ég er duglegur við að setja borð út og þjónusta viðskiptavini frá klukkan átta á morgnana," segir Steinþór sár. Hann viðurkennir þó að bráðabirgðaleyfið gildi ekki fyrir þann borðafjölda sem hann hafi haft úti í dag, það sé einungis vilyrði fyrir þeim borðafjölda sem þar greini. Það sem stingi hann hins vegar séu þau ummæli lögreglumannanna að hann muni aldrei fá leyfi fyrir fleiri borðum vegna þess að hann sé með dónaskap við borgarbúa og sé að yfirtaka torgið.

„Ég er skilningsríkur maður en botna ekki í því af hverju hlutirnir þurfa að vera svona erfiðir," sagði Steinþór að lokum. Ekki náðist í þann fulltrúa lögreglustjóra sem annast veitingu leyfa til borðafjölgunar.